roastogáisa@miessemearkun.no

Interneahtta čessenprográmma lean jo rahpan ja dál de lean čállimin čujuhusa: www.roastogaisa.miessemearkun.no.

Ruksesmiessi livvada. Foto: Johan Brun.

Geavaheaddjinamma: nástegállu ja čoavddašatni livčče gal čiegus, muhto lea:  (roasttánat). Nu fal.

Enter- boalu spoahkkalan, ja de rahpasa munnje Roastogáissa orohaga (dárogillii: Frostisen reinbeitedistrikt) eatnamat. Gurutbealde boaluin girddašan 3- dimenšunála kárttaid mielde ja nu de seaivvun geasseláidumiidda. Sáhpana olgešbeal boaluin várdadan ja in oro gal gávdnamin ealu. Ii fal ii heaggage oidno. Dalle ii leat go girddašit kárttaid mielde.

Gal de gávnnan ealu. Sii leat leavvan ruonás vuovderámaide. Deaddilan ctrl ja H= háikkádit. Bohccot loktejit oaivvi ja čoahkkánit. Ja nie de deattášan moddii ctrl ja H vai eallu loktána ordii. Deaddilan ges ctrl ja B=beana. Dan bijan vuodjelit ja doaladit rávddaid. Ieš mun láidestan gitta seaibbohiidda ja gárdenjálbmái.

Boahtte govas de oidno dolla gárddi olggobealde ja beana das livvada lávkka balddas. Mu birra jorra eallu ja dihtor høytalariin gullo ruovggas ja gaccat.

Leken reinkalv/miesie. Foto: ai naturfoto

De mun njoarostan čuoivvaha ja merken alccen. Ja čahppada merken villjii. Biddojuolggát miessi livčče oappá, muhto in muitte mearkka. Deaddilan Alt ja M=mearkkat ja váljen nama mielde, ja de ihttá unná govaš mas lea oappá mearka. Ja nie de merkedalan. Ikte merkejin 50 miesi ja odne fas 150 miesi. Gurutbealde šearpmas leat skivnnje- ja guobirbihttát sákkástuvvon sutnii,  rehketdoalu dihte.

Iigoson oktage sáhte munnje ordnet jobegoit dakkár virtuella miessemearkuma? Mun in olle gárdde lusa!!!